Page d'Accueil

Asanza e nga mane nyoñ betit akum

   

A nga bo na, Asanza ve tabe ngum nlam, te yeme môt a ne mongô, nge nyô a ne mvendé, bese ve abime dada. Nde be nga telé éyelui. Ze ve so, nye na,

"A Asanza, me zuya melui".

Be na,

"Ke'e bisiñili".

Ze ve su'ulane bisiñili si, a da'a. Asanza ve futi mo minkôm. Be nga su'u minkôm. Be nga lui bikpwelé. Be mane lui, bese be kutan, a ke wobane mendim. Eyoñ be nga so, ve tebe nsamba, be Ze na,

"Liti'i bia môt a ne mvendé, ndemben w'aye nyoñ bikpwelé. Amu bi nji bo metyi'is mefe, ve liti bia môt a ne mvendé".

Ze ve fombô bese, ve abime dada, te ke môt a ne yeme na, a ne mvendé. Ze ve ke liti via, ase ve kutan a to'é akum, ve ke naan nda. Be na,

"Kelek, ô dimiya".

Nde Ze a nga ke ja dé.

Zo'o ve so, a bili bisiñili. Ane a nga kui Asanza e mbe, nye na,

"Me zuya melui".

Be na,

"Tabe'e si".

Zo'o ve tabe si. Be na

"Melui mangan ma me nji bo metyi'is mefe, ve na, nge bi mane lui ô liti bia môt a ne mvendé".

Zo'o na,

"Luian".

Be ve futi mo minkôm, ve be nga su'u minkôm. Be nga lui bikpwelé. Eyoñ be nga mane lui, ve kutan a ke woban, be nga so, ve tebe nsamba, be Zo'o na,

"Liti'i mvendé, ô nyoñe biôm biôé".

Zo'o ve fombô bese, ve abime dada, avale ke dada, te ke yeme nyô a ne mvendé. Nnye ke ve liti élitiliti. Ase ve kutan, ve to'é akum, ve naan nda. Ane Zo'o a nga ke momo ja dé.

Betite bese ve man, te ke môt a yeme be mvendé, a li'i na, ve Kulu. Ane betit be nga ke kate Kulu na,

"Asanza e maneya bia akum".

Kulu na,

"Jôka'an, m'aye ke akiti".

Mam me ngô'é, Kulu ve loen nga, nye na,

"Bii'me kabat, ô wôé. O bubu'u bisek jôme da, miñya a évu jôm avok, afus avo'o môme map".

Ane ngal a nga mane bo nalé. Bia tyé, Kulu na,

"Futi'i biôm nkoé, bi ke melui".

Nye ve futi. Nde be nga té a ke.

Ane be nga kui be Asanza, Kulu ve tabe si, a nyoñe bisiñili, a su'ulane si. Nye na,

"Me zuya melui".

Asanza ve futi mo minkôm, ve be nga lui. Be ngenan be luik, Kulu nye ngale na,

"Za'a me bidi".

Ngale ve vaa jôme miñya mi kabat, ve kuli si a ntuba ékon. Kulu a nga di. Kulu na,

"Môte ke a ne mvendé ane me na, a za'a bi di beta miñya mi kabat".

Nyôna ve kôlô si, a zu tabe, be nga di. Nyô mbo'a zu tabe, ba bevo'o be li'i be to si. Kulu nye ngale na,

"Ve bendôman b'awô'ô zaé ? Za'a fe bidi bife".

Minga ve soo jôm ések, a afus avok. Kulu na,

"Bendôman be tame zu di".

Ba be mbe bongô, ve so a di bidi. Eyoñ be nga mane di, ve beta bulane melui. Eyoñ be nga mane melui, ve kutan a ke wobane mendim. Aso be nga so, ve tebe nsamba, be Kulu na,

"Bi ne te nyoñ akum metyi'is jame da, liti'i bia mvendé, ô ke akume dôé".

Kulu ve kôlô si, nye na,

"Mvendé j'abôbo meliti mebaé. Eyoñ m'ate loene mia bidi, ye sa bia bemvendé bi ate di miñya mi kabat ? Fé fe m'abeta liti ?"

Ane Asanza e nga kee nye bikpwelé bié bise, amu Kulu a nga dañe be fek.

Nalé Kulu a nga yem mvendé Asanza.

 

Kulu a nga yemelane fe'e medu'an Asanza e nga bôndé.

Ba kane nkana ôte éyoñ bôt be ne te ésemé.

 
 

Accueil Copyright © 2007-2011, Culture Vive