Page d'Accueil

Betit be nga ke nyoñ éfom

   

A nga bo na, batiti ase ve tabe nlame wua. Nde Mvom a nga ke tabe nlame wé. Eyoñ mimbu mi nga lôt, mfeba zaé a nga kui betit. Be nga ye wu zaé. A tô’ô bikôtôk, te fe yen ôkôkoé mboñ, nge ôyôme jôme éziñ ya di. Nde bôt be nga ke be Mvom, a ke koé na, som Mvom a ja’a beta jôm, éfom. Nde be nga soo foé, be kate betite bevok. Be na,

“Eyoñ bi aye wu zaé va, nde som Mvom a di éfom ».

Be na,

« Za a ye taté bia ke nyoñ éfom ? Ojoé na,

“Ma”;

Ane Ojoé a nga kôlô, ve lumbu zen. A ke kui be Mvome na, a zu koé na, Mvom a ye’e. Nye na,

“A Mvom, me zuya nyoñ éfom, bi nga ye viane wu zaé ».

Nde Mvom a nga kôlô si, ve ke faté éfom, a nga zu a bili. Ve kalan Ojoé, nye na,

“Nne a ne na, éyoñ w’aye wulu éfome zen, ô kele w’ajô na, ‘Batité, Mvom a didi ôkaé éfomé ; batité, Mvom a didi ôkaé éfomé’”.

Nye na,

“Nge ô vuan, j’aye beta bulan nne, é zu koé me va”.

Nde Ojoé a nga lumbu zen, a ke yia jia, aval ane Mvom a nga lepe nye,

“Batité, Mvom a didi ôkaé éfomé ; batité, Mvom a didi ôkaé éfomé ».

A ke kui afane zañe na, ve sendé mbek, si bô ! Te fe yem ane a nga bo jô’ôk Efom fi ! J’ajañ. A jeñe fe, te yen. Nde a nga kôlô, a ke akekui Batit a nga to. Be na,

“A Ojoé, éfom é né ?”

Nye na,

« Jôka’ane ma, éfom é li’iya ».

Be nga jô nye.

Bia tyé, be maneya jô Ojoé, Zo’o na,

“Za a ke den ?”

Okpweñe  na,

“Ma”

Okpweñ ve lumbu zen, a nga suane be Mvom. Mvome na,

“Aya, a Okpweñ, ye jôm é bo wôé ?”

Okpweñe na,

« M’azu nyoñ éfom ».

Mvom a ke mane faté éfom, a to’é, a kee nye. A nga mane nye lep, nye na,

“W’aye wulu éfome zen, ô kele fo’o w’ayia, ve na, ‘Batité, Mvom a didi ôkaé éfomé ; batité, Mvom a didi ôkaé éfomé’”.

Nde Okpweñ a nga lumbu zen, ve ke a yia ane Mvom a nga lepe nye. A wuluya afan ayap, mfa’a a ke kui ja dap, a nto bebé. Okpweñ ve sotan mbek, bô ! Si. Efom fi ! Okpweñ a nga ke a sase mo, ve ke kui,

“A Okpweñ éfom é né ? »

Nye na,

« Jôka’ane ma, éfom é betaya li’i ».

Zibi na,

« Mamien m’ake éyoñe ji ».

Bia tyé, Zibi ve lumbu zen, fen ! fen ! fen ! A nga suane be Mvom. Mvom na,

“A Zibi, jé é bo wôé ? »

Zibi na,

« A Mvom, jôké’é ma, bi ju’uya zaé, a zu nyoñ éfom ».

Mvom a kôlô si, a nga mane faté éfom. A kalane Zibi éfom, nye na,

“Ake ane w’ake na, ô kele w’ayia ve na, ‘Batité, Mvom a didi ôkaé éfomé ; batité, Mvom a didi ôkaé éfomé’”.

Nde Zibi a nga lumbu zen, wulu, wulu, wulu. A ke kui bebé ja dap, Zibi a nga sotan mbek, ngulum ! Si. Efom fi ! Zibi a nga kui nlam atiñ asu, abima wo va,

« A Zibi, aya wôé ? »

Nye na,

« M’avini minsili. Efom é li’iya. M’ake ane Minla a jep ôkok ».

Zo’o na,

« Mamien m’aye ke akiti ».

Bia tyé, Zo’o émien a be’e nyô, ve jimbi zen, bilé bi ake bi abu’i. A nga suane be Mvom, a ke jian éto si. Mvom a zu nye tabe mebo. Nye na,

« A Zok, ane bi nga kandan, me nji yene wo nne. Jé é bo ?”

Nye na,

« A Mvom, jôké’é ma. Akukute bongô m’alôme nne, bidi bise w’abo lôme’ ma, te ke nyô wua a kui bie. Zaé é nga ye wôé bia be bon. Nde mamien m’ate jibi té si, a zu nyoñ ».

Mvom ve kôlô fe si, a nga faté éfom. Efom nkoé lut ! Ve soo je, a kee Zo’o. Zo’o a lum nkoé éfom mvus. Mvome na,

« Ake ane w’ake, ô bulu simesan atiñ ya éfom. Zen ése fo’o w’aye ke den, akekui w’aye kui ja dôé, ô kele fo’o ô yi’a ve na ‘Batité, Mvom a didi ôkaé éfomé ; batité, Mvom a didi ôkaé éfomé’. Nge ô vuane jam ete, wo teke kui jôm”.

Nde Zo’o a nga bembe zen, a ke fo’o a yia, ve na,

“Batité, Mvom a didi ôkaé éfomé ; batité, Mvom a didi ôkaé éfomé ».

Ve a nga suane mefupe ya ja dé, a wô’ ane nnôme kup a loñe ja, ve zu wulu avôle na, a ji’a kui. A ye beta dañe mon nkok, ôkômen ve ka nye abo. Zo’o ve sa’é mbek, dudu ! dudu ! si. Efom fi ! Zo’o a nga kute kôp afup été. A nga ke a ndulan éyôé ja. Bôte bese fe’e ve jañ, te fe yeme jam be bo’ok.

Nde Kulu a nga suan. Kulu na,

« Akiti ma m’ake nyoñ éfom ».

Ze ve valé si, ve ke futi Kulu mo nyô, a bibi nye si, ne bô ! Kulu ve kôlô si, a nga ke a sase nyô. Nye na,

« Mesebe ! Ane me nga so nkôl Otu’utu, m’abôbôlé ».

Ze a tôñe nye atan, ve ka nye va, a bebe nye fala’a mvus, ne kum ! Kulu a nga so falak, élo’  a mise mese. Nye na,

« Mesebe ! Ane me nga so nkôl Otu’utu m’ajejañ »

Zo’o na,

« Mia, tama jô’ane jôm éte”.

Nde be nga jô’é Kulu. Kulu ve dutu ôkomvolo, a ôbo mfe’e vié, ve lumbu zen.

Kulu a nga suane be Mvom. Mvome na,

“A Ku, jé é bo wôé ?”

Nye na,

“A zu nyoñ éfom ».

Mvom ve kôlô si, a nga faté éfom. A to’é nse’ éfom, a kee Kulu. Nye na,

“Kulu a né ?”

Kulu na,

« Me nyô ».

Nye na,

« W’awô’ô na, bôt b’aso momo nne, ve na, nge me mane kee be éfom ana, be viane ke kui zen, be vuane jam m’ate lepe be. Ake ane w’ake na, ô kele fo’o w’ajô ve na, ‘Batité, Mvom a didi ôkaé éfomé ; batité, Mvom a didi ôkaé éfomé’. To jé j’abo wo zen, ô jô’ô fo’o ve nalé. Nge ô bo te vuan, éyoñ éte w’aye kui éfom. Nge ô vuane kik, ô kui ve momo”.

Nde Kulu a nga nyoñ nse’ éfom mvus, ve lumbu zen :

« Batité, Mvom a didi ôkaé éfomé ; batité, Mvom a didi ôkaé éfomé ».

A sendé ôyôm mbek, a ke labane si, ve na,

« Efom, éfom, éfom ».

Ve kôlô si, ve a ke a yia,

« Batité, Mvom a didi ôkaé éfomé ; batité, Mvom a didi ôkaé éfomé ».

Ve  a nga ke.

A kui afane zañ, nlo abo, ndiñ !  Kulu na,

“Efom, éfom, éfom”.

Nalé ngum nté zen. Kulu a nga vam asu nlam. A nga suane betit be nga to ve a jia ése anyu ;

“Batité, Mvom a didi ôkaé éfomé ; batité, Mvom a didi ôkaé éfomé ».

Nde a nga kui aba été, betit be nga bôm ayenga. Be nga kuli éfom. Batiti a nga di éfom.

Nde betit be nga nyiñ, Kulu a ke nyoñ éfom ana.

 
 

Accueil Copyright © 2008-2011, Culture Vive