Page d'Accueil

Bewo’o be nga ke ya éngoñ

   

A nga bon a, wo’o a bili nsamba wé, nji ke a bili énwé. Nde zaé é nga kui be be, be nga ye vi’a wu. Nde nji a nga ke a tyik. A ke kui afan été na, afombô a fombô abôndôñe yat, a ta ane beta éngoñ a lumu. Nji na, « A bongô, za’a yenan. Nde bon a binga b’aye me mane wu zaé ». Nde be nga lumbu, ve kui éngoñe si.

Beta éngoñ ate a nga tebe fômônô. Nji a fombô li, t eke ndik ; a beta fombô li, teke ndik. Nji a kute kôp, nye na, “Nne m’abo aya, abim nku’éngoñe di ?” Ake a ke mise na, a lô ane beta ôtu’énga a tele, ô ve’ane beta ntya éngoñ. Nde nnôm nji a nga wua mo ôtunga. Ve daa wo a mbili abui éngoñ, a nga vit ôtunga, ve bômbô bubutu ; mebo me yeme nye ôtunga, mo ke me bili ntya éngoñ. Nye bon a beyale na, “Za’an”. Mbam benji ô nga bête yôp, be bet ôtunga, be kalan mvus be nnôm nji. Be nga ke éngoñ. Ve be nga ke b’aya éngoñ.

Etun señesan ! j’alôt. Nnôm nji a vaa tyiñ, nye na, “A bone bam, a binga bam, aya ane mi ake mi aya éngoñ, mi aya éngoñ, mi ye’e jé ?” Ngal a mbe ékômba ba ntôle mon, be na, “Bi aya éngoñ, bi ye’e wo ». Be nga soo ngoñ, be kala’an nnôm nji, a ja’ak. Nde be nga mane be’e abui ngoñ. Be nga sise si. Nde a nga suu ntya éngoñ, ane a nga sise si. Ba be beya ve lumbu afan akôé.

Nye a so, nnôme wo’o a so, bem ! b’atôban. Wo’o na, “A nji mo tat, ye bi awu zaé va ? Tame me ji’a ve ngoñ”. Nji na, “O lô akok, za’a ke”. Nnôme wo’o ba be beya ve yoñelane zen, a bon. Nde be nga suan éngoñe si. Nnôme wo’o a fombô li, teke ndik ; a beta fombô li, teke ndik. Nye na, “Nne nji a te bete jôme jina vé ?” Adaa a ye daa mise na, a lô ane zendé é ne beta ôtunga. Nnôme wo’o ve wua mo ôtunga wôs ! Wôs ! Wôs ! Ve kui mefa’a me ôtunga, a yeme mebo ôtunga, a late ke mo ntya éngoñ. Nye bon a beyale na, “Za’an”. Mbam bewo’o ô nga bête yôp, éngoñ, fôlôt ! Be nga ke b’atu’éngoñ.

Etun señesan ! j’alôt. Nnôme wo’o a kui tyiñ, nye na, “A binga bam a bon, aya ane mi aya éngoñ, mi aya éngoñ, mi ye’e jé ? » Ekômba nga ba ntôle mon, be na, « Ke bi aya éngoñ, bi ye’e mintya mi éngoñ ». Nnôme wo’o a kpwel évô.

Etun j’alôte na, nnôme wo’o a beta kui tyiñ, nye na, “A biôm biam, abé. M’asili mia na, mi aya éngoñ ji, mi ye’e jé ?” Be na, « Ye tate a ndeñele bia nsili ? Ke bi aya éngoñ, bi ye’e mintya mi éngoñ”. Nde a boya na, mfa’ane b’akobô, nde mongo a zu a sobô a mfan. A ke a ye ke mis abôndôñe yat, a lô ane bewo’o be ne ve ne julubu ! julubu ! Nnôme wo’o ve suu fo’o ntya éngoñ, ve  sise  si. A ke kui analé na, a ke tabe, a fombô ane b’ake b’aya éngoñ. A nga ye viane wu ôlun, nye na, “Biôm biam bi buu mekut a jé ?”

Ane a ngenan a bôndé’é fek, mongô ve suan éngoñe si, ve kolé mfan. Mon a mbe ntô, ve telé ke ébaé a nye, bam ! kup ! A beta telé ébaé a ékômba nga ; mongô a nga lepe bewo’o yôp. Bewo’o be nto na, be kele mfa’éngoñe wu, t eke vôm be ne sis : be beta ke mfa’a wu, teke vôm be ne sis. Otunga ésa a nga bili, ô nto be ôyap. Ve be nga kon ényaé. Nyôna a ku va, nyô mbo’a ku va. Bewo’o be nga tu’i awu. Mon a nga to mbatañ, nye étam a nga li’i. Obia’ôte ve sotan, ve ku si, a lumbu mbi a si se, v eke doé ésa.

Nde ésa a nga fombô nye, nye na, « E ! A ôyôme mone viam, éyalan mi ate me yalane den, a sili mia na, mi aya éngoñ, mi ye’e jé ? Mi aviane jô na, bi aya éngoñ, bi ye’e mintya mi éngoñ, awu te nsamba w’amane me wu di ». Nde mongô a nga lumbu, a loene bôte ya nlam. Be ve so, be nga litane bewo’o. Ane mbam bewo’o ô nga jañ ana, b’aya éngoñ, be ye’e mintya mi éngoñ.

 
 

Page d'Accueil Copyright © 2008-2011, Culture Vive