Page d'Accueil

Bijo bi ne a za?

   

A nga bo na, môt a fa’ébé, ane a nga ke jii je, a koé étua beta nyo a fiti été, mvome tyôtyoé. Ve bete akoñ, nye na,

“Me tame wôé nyo nyô”.

Nyo nye na,

“Te ke na, ô ne me wôé étam. Kele loene bôte bese ya nlam, to’o meyoñe mefe. Jôé dam e ne na, Bijô bi ne a za. Kele nyoñe bôt abui, be za beta jô ba bevok, éyoñ m’aye ke”.

Môt ve ke mbil nlam, a bôm nku, nkul akoñ, a soo meyoñ, a ayoñe dé se. Bôt be mane so, lut ! Be na,

« A môt, nkul ô ne jé ? »

Nye na,

“M’aloene mia, étua nyo é fiti me ébé. Ane si é nga téé, me ngenan te yen abime nyo di. Nné a ne mvom, nje j’adañe nyo ése. Ve nyo nyina, ke éne minemine mvom, mvome tyôtyoé. A te fe me tote jôé dé, nye na, ‘Jôé dam e ne na, Bijô bi ne a za’ ».

Nde bôte bese be nga yoñelan nsamba, a zu koé nyo ébé. Ve ke tebe, ve yange ba bevok. Be nga mane li fé abui, a telé ébé éngengeñ. Nde nyo a sili be nsili, nye na,

“Ye môt mfe a ngenan mvus ?”

Be na,

“Te ke fek, bi jaéya bese”.

Nye na,

“Bijô bi ne a za, ma he nyô ».

Bôt be nga kutane mekoñ. Atebe nyo é nga tebe tetele va, bôt ve bañe fé. Ve a jô be na,

« A ke he di, bijô bi ne a za ? »

Bôt be nga kutane nye mba’ane mefa, te bo jôm. Be wua mekoñ, te ke jôm. Ane a nga jô bôte na.

“Me keya, bijô bi ne a za ?”

Nyo ve ke ana, te ke môt a wôé, te ke môt a beta jô nyô mbo’o na,

“Bijô bi ne a za ?”

 

 
 

Accueil Copyright © 2008-2011, Culture Vive