Page d'Accueil

Bobenya ñ bebaé

   

A nga bo na, môt ve biaé bone bebaé. Ane ésa a nga nye’e wua, nyô mbo’o ve bo ane akut. Esa a nga vini nyia, nalé fe a nga vini mon. Nde nyô a mbe fek, ba ésa be nga li’i aba. Wôna nyô a mbe akute nyô, ve kôlô aba, a ke koé nyia nda, a nga kôban nduan ésôkôé. Nye na,

“A nane, tate a nga taté vini wo, a viniya fe ma, a jô na, ma me ne akut. Ajô te bi nto mam mangan, ve bo fo’o me nda été va. Nge w’abi bidi bi nlulup, ve bi bi nga di fo’o nda été va. Bi aye fe ke mam mangan atan, amu tate a viniya fo’o bia ».

Nde be nga tabe nalé. Nge nyia a mane yame jôme ya di, ba mone wé be nga di fo’o nda été valé bebaé. Esa ba mon a nga nye’e, be ke be to atan.

Nde éyoñ ayôm melu e nga lôt, monyañ a mbe fek a nga zu koé nye môse wu. Nye na,

“A mojañ ye nge ô tabe nda été, te fe kui atan ?”

Nye na,

« W’ayi na, me beta ke vé ? »

Monyañe na,

“ Za’a bi tame ke bi ajeñe abôm ».

Nde be nga ke. A kui afane na, monyañe na,

« Wo ô kele mfa’a ya mbo nga, me ke m’ake mfa’a ya mbo nnôm. Nyô a ye taté yen ôbôm, a ye loene nyô mbok ».

Ane be nga kandane mezen, be nga ke b’ajeñ. Nyô a mbe akut a ke kui élobé été na, a zu koé na abeñ émvieñ e tele e to abui mintoñ. Nde a nga bete yôp, a tyi’i na, mintoñe minyin. Ve bulane zene ya ja, a ke solé. Ane a nga so, a loene monyañ. Monyañ a zu kui na, nye na,

« Obôm m’ate li’i va, ñvie vili. M’ate taté vie li’i, amu m’ate taté ke afan akôé ».

A du’u nye, amu a jô na, a ne akut. Nye na,

« Ntyi’i he ».

Eyoñ be nga mane tyi’i na, ane be nga bulan. Nyô a mbe akut ve ke nyoñ mbamba mintoñe minyin a nga taté tyik. Monyañe na,

« W’ate soo vina vé ? »

Nye na,

« M’ate tyi’i beta jôm ate bi aso li”.

Nde be nga kui ja, be nga mane bôm abôm.

A beta bômbô melu mebaé, monyañ a mbe fek ve beta nye zu koé, a nga loene nye. Nye na,

 “A mojañ, za’a bi ke bi’ajeñe vio ».

Ane be nga baman, ve ke. A kui afane na, ve beta kandane mezen. Akut e nga zu koé na, beta ébane vio a kele si. Ve a nga ke a té vio, a té na, môm menen mebaé. A ke solé, a nga loene monyañ a mbe fek. Monyañ a zu kui na, nye na,

« Ya, beta ébane vio m’ate li’i va, nnye ate nyô. M’ate taté ke afan akôé, me funa ko na, ô ngenan ôyap mvus”.

Nye na,

“Njebe’e”.

Ve be nga ke b’até vio. Ane be nga mane wô’ô vio, be bulane ja. A ke kui zene na, akut e nga to’é môm mebaé a nga solé. Nde be nga kui ja, be nga di vio.

Melu mebaé, monyañ a beta so. Nye akutu na,

“Za’a bi ke  bi’ajeñe koé”.

Nde be nga lumbu. A kui afane na, be beta kandane mezen. Ane akut e nokônokô, a koé na, beta ébalakaseñ. Afombô a fombô ébalakaseñ nnké na, a lô ve ne bemaa ! Akute na,

« Jé ji, ye akok ? Za aka’a anene beta ako’o di ! »

Ve ke suk, a nga wô’ényenyeñ. Beta mimvot mi’abebemane nyô. Akute na,

“Sa ke ako’o di. Eyoñ bia tate bi nga bo bi tabe’aba, a mojañ, a bo’o kate bia na, beta tit a ne afane mu, zok, a funan akok. M’ajô fo’o na, nje nyô”.

Akut a nga ke a fombô. A ta ane beta mimbañ mi beme. Ve a nga fo’o mimbañ, a vaa mimbañe mibaé, a jô’é si. A nga tyi’asañ, ajô’é si. A tyi’i fe njem, ve mane ka’a biôm bite mbom. A nyin, a telé étu, a nyoñe fe mimbañ, a beté étu, ve bulane zene ya ja, a ke solé biôm bite zen, a beta bulane vôm zo’énga bô. A mane kpwa ôyôm nkpwa’a mbôma’ane, a ntele beta élé si, a fôté nye nkuk. A nyoñe mebui, a ta élé si. Nde a nga loene monyañ.
Monyañ a nga zu a nyap afan, a zu suane vôm akut a nga tele. A daa daa mise na, a lô ane zo’é beme, nye na,

« A ! Nde ô kuiya va. Ke m’ate li’i zo’é beme va, éyoñ m’ate ke afan akôé. Ane m’ate jô na, m’aye kôme loene wo den ».

Monyañe na,

« Eññ, nde zo’o nyô ! »

Nde be nga bulane ja. A kui jale na, nkule kendeñ ! Bôt be nga sulan. Nye na,

“Me someya zok”.

Nde bôt be nga kôlô nsamba, be nga yoñelan afan, akut a li’i a bô si. A kui afane na, bôt be nga lôñe bibem, ve be nga ba zok. Akute na,

“A nan, za’a bi ke yen ane b’aba zok”.

Nyia na,

“A ! A mone wom, jé m’akôsa wu dulu ? Za a ye ve bia zo’o mimfefek ?”

Nye na

“ Eyoñ ése m’abo me so’afane va, ve w’abo yene’e mam m’abo me bo’été ? »

Nyia na,

“Me wô’ô yen”.

Nye na,

“Za’a bi ke, nge be ke be nyume bia, a se ke ajô”.

Nde be nga ke. A ke kui éba zo’o na, be ba zo’ôyap nnké, ba nyia ve tabe mon ébem zene ya ja. Nde be nga mane ba zok. Be nga litane zo’o ja, te ke môt a ve be ôfufus. Ane bôte bese be nga mane ke ja.

Nye na,

A nan, mbula’ane ja”.

Nye na,

E ! A mone wom, jé w’ate jalé me dulu ?”

Nye na,

“Aya ! Ntame ke”.

Nde be nga kui ja. Bôt be nga mane di bidi. Be na,

“Be kabe’e zok, bi tyaman”.

Eyoñ be nga ye kape zo’o na, nde akut a nga nyokane si. Nye na,

“A benya bôtô ya éga zok, éyoñ mia monyoñ mi awulu, nga mi some zok, a bo wo aya ?”

Be na,

“A té wo énam”

Nye na,

“Eyoñ évé ?”

Be na,

“Ke éyoñ mi aba zok”.

Nye na,

“A mojañ, éname zo’o jam é né ?”

Ba ésa na,

« Be ke b’aye kee wo ôfufuse zok ».

Nde akut a nga sili na,

« Zo’o mi nga kape nyô, za a ne je nsom ? »

Bôte bese na,

 « Ke monyoñ a nga some zok”.

Akute na,

“Nge nnye a ne nsom, a za’a mimbañ, a njem, a asañ. Nalé m’awô’ô wô’ô na, zo’é be’e biôm bite bila”.

Bôt ve ne ndibik ! B’aku bivô. Be na,

« Akutu a bele. Ngume zo’o wu, bi nji yene mimbañ ya été ».

A ke samese na, môte nyô a nyoñe mimbañ, te keé.

Nde akut a nga jô be na,

“Me tame kate mia ane bia mojañ bi nga bo bi wulu’u”.

Nye na,

“Eyoñ ôsu, a nga zu loene me na, bi ke bi ajeñ abôm. Ane bi nga ke. Eyoñ me nga yen mbamba ôbôm, a loene nye na, 'Za’a bi tyi’ôbôm', éyoñ éte me tyi’iya mintoñ minyim, me soléya. Aso a nga viane so, nye na, a te viane yene vie. Ane me nga ba’ale ajô te. Bi beta ke ake baa, me beta yene vio. Me jepe môm mebaé, me solé’é. A loene nye na, « Za’ak, a viane so, a jô na, 'M’ate li’i vio vina va'. Me beta ba’ale ajô te. Nde bi ate ke éyoñe ji bi na, bi ake bi ajeñe koé. Me ke some zo’o nyô. Ane m’ate vaa mimbañ, a asañ, a njem. Ane m’ate solé. A loene nye, aso a te viane so, nye na, é nto zo’o jé. Nde m’ajô mia na, nge nnye a ne zok, a za’a mimbañ, a asañ, a njem”.

Ane bôt be nga ku ne kubuk ! Be ésa na,

"Wo ô ne bone bebaé. A kôsa bo nyina a nga bo akut, a nji kobo éfia akut éyoñe ji. Jô’ô nyo mon a nyoñe biôm bi, bi tyi’ajô’”.

A ke limeti biôm be mon, te keé. Nde akut a nga lumbu zen, a ke to’é mimbañ, a asañ, a njem. A soo mimbañe na, si kum ! Nde bôt be nga tyi’i na, akut a ne zok. Zo’é nga yoñelan nda nyia akutu. Nde akut nnye a nga té énam, a to’é a kee monyañ. A nga kuane minsôn, a ve fe bôte bé. Akut a tyi’i minga na, nda. A nyoñe fe mimbañ, a lu’u wuna minga, a lu’u wu mbo’o na, minga. A nyoñé, a wua bivin. Akut a bo na kum.

Ane akut a nga dañ mfefe’ana, amu som a nga jibi mam monyañ a nga taté nye bo. Nge a nga bo ôjeja’a, ve monyañ a nga dañe nye fek.

 
 

Accueil Copyright © 2008-2011, Culture Vive