Page d'Accueil

Ebame ba Mvu

   

nga bo na, Ebame ba Mvu be bialan. Mvu a to Ebame moneka. Nde Mvu a nga kôlô a ke nlame bôt, wô ! Ebame ke ve li’i fé. Ebame a ke a di ve biaseñ. Bôt be baman éñkbwasa be nga bendé ngôm. Ebame a kee alo, a wô’ô ve na,

“Mvu, biik !”

Nde be nga sôp nlam. Bia tyé, be beta bamane bemvu, ve lumbu nsôm. Ebame a kee alo, a vô’ôlô ve na,

“Mvu, biik !”

Mvu é nga wum melu mese nsôm.

Nde môse wu be na,

“Bi nga ke abiôm”.

Be nga kôm mevot, nde be nga nyiñeli mesu afan. Be nga ke b’asô’ôlan. Be kui ndôban abiôm, be nga ke b’ajô’é mevot, be nga di bidi. Nde be nga kôlô, be ke ya ju. Mvu a li’a ja’a bibôbolo va, nde Ebame ke a bete ntute yôp. A fombô si, te fe yene môt. Nde a nga bete mis, a fombô Mvu, nye na,

« A Mvu monam, bia wo bi nga kandan, wo w’ake nlam, me ke m’ali’i fé. Abime jam w’abo nlame di, ye wo ô mba’a na, me tame tyô’ô nyia wom a nga li’i fé, ma me tyi’i nye ébône tit ? Eto ése me to va, minsôm mise b’ake, me nji wô’ô duma môt mfe, ve na, ‘Mvu, biik !’”.

Nde Mvu a nga tebe mis, a nga fombô Ebame, nye na,

“A nan, jôké’é ma. W’abele fo’o ane w’ajô. M’akate wo jame da na, ô za’a tabe éba tit den, ô yen ane b’abo be bo’o ma. Nyo mon, m’awu fo’o ve duma duma, m’adidi wo jôm. Womiene ke ô nyene den”.

Nde Mvu a nga siki, ve yale ke ju été. Mengôñ m’atô’ôlan, mbendé ô nga jô, be nga ke b’awôé betit. Nde be nga so.

A kui éba tite na, be nga suu betite si, be nga ba betit. Mvu a ye nyiane metyi, be toé Mvu abaé amañ, Mvu a taté,

“Kpwaé !”

A  bete mis, a fombô ndômenyañ Ebame. Ebame a me’ete nlô. Be nga ba betit. Mvu a ye lindi ôtitit, be kômôtô’ô mbeñ Mvu a taté,

« Kpwaé ! »

A bete mis, a fombô Ebame. Ebame a me’ete nlô. Nde be nga mane ba betit, be nga mane kaban. Ane be nga lumbu ja.

Mvu a li’i, a nga ke a nyiane metyi. Nde a nga fombô ndômenyañ Ebame, nye na,

“A ndômejañ, w’ate sili me na, m’awum. Zesé duma m’awum, m’adidi jôm. Nne be wô’ô bo me ve ana”.

Ebame na,

“A monam, me yeneya fo’o nalé”.

Mvu ba Ebame be nga bialé, Mvu a kat ndômenyañ ana.

 

 

 

Accueil Copyright © 2008-2011, Culture Vive