Page d'Accueil

Kulu a nga loo Nkoo

   

A nga bo na, ésa Ze ve tabe beta nlam. Nde a nga mane bé abui melen. Ane a nga wu. Ze ve li’i a to. Melu me nga lôte na, Ze a nga fa’a bibé, amu betit be nga di nye melen. Nde Ze a nga bôlé vôm ate, a ke tabe nlam mfe. A nga bo a za’a jii bibé, a tyi’i fe melen ésa a nga lik.

Kulu melu mese ve ja’é mbon be Ze. Ane a nga sili Ze na, “A Ze mo tat, aka’a abui mbone di e wô’ô soso vé ?” Ze na, “Ke afup melen tate a nga lik, nne m’akpwé bikañ bili’i wôé. Jame da, betit b’adañe nya’a  nya’a melene mete nyô”. Nde Kulu a nga tabe évô. Be nga ke b’alaane minlañe mife. Kulu na, “A Ze, me nga ke ja”. Ane Ze a nga mane ya’ane nye, Kulu ve ke ja dé.

Bia mam me tyé, Kulu na, « Me tame ke jii bibé bi Ze, me ke m’ajeñ mvine ya di”. Nde Kulu a nga lumbu, ve ke kui bili’i bi Ze. A nga ke a top mvin, a futi mfek. A nga ke mba’a bibé. A ye beta tyi’ilane na, ve ne fububu ! ébé été. Kulu a kute kôp, nye na, « Nne m’aye bo aya éyoñe ji ? »

Ane a ngenan a kobô’ô nalé, a vô’ôlô na, ékinda é nga zu j’ajô, bip ! Nko’o a zu laban ébé yop. Nye na, « A Nko’o, w’akeé ? » Nko’o na, « Ke m’azu m’awulu ». Nye na, « Jika’a lôt, mi mia adañ ézezam, ô za me su ndamane mame mam m’abo nne”. Eyoñ a ngenan a jô’ô nalé, a kele mfa’ébé wu, a ke bibi wo mfin ébé, kpwa ! “E ! tame jô’é nalé, m’atame kobo Nko’o le”. Nko’o na, “A Kulu, mia za mi akobô ?” Kulu na, “W’awô’ô na, me ne mefo’o ébé si nne ; ke bia bengon bi avôé ». Kulu a beta ke bibi ôyôm abaé mfa’ébé ôvok, kpwa ! « E ! A Kulu jôké’é ma, m’adañe wô’ô njuk”.

Nko’o na, “A Ku, za émien le ?” Kulu na, « A Nko’o, ô mba’akut ! Ke m’ate kate wo na, bia bengon bi avôé ébé si nné ». Nko’o na, « Ye w’abele ? » Kulu na, « A jañ ; ane me nga kandane Nya Bibôtô, tame zu yen”. Nko’o ébé si, kitik !

Kulu na, “A ! A Nko’o, w’amane dimeli me bengon”. Nko’o na, « A Ku, za aval ajô le ? Jika’a liti me bengon w’ate jô be ». Kulu na, « Ane me bo te liti wo be, jé é boé ? » Nko’o na, « Ye ve m’ambebe wo fé den ? » Kulu na, « A ! Ye m’avô’ôlô wo, a Nkok ? Za a ne wo ve ngule w’abepe me fé ? A w’atame bepe me fé, ye akoñe dam ô ne bete, ô wua fé ? M’atame jô akoñ, ye ô ne bete mfe’e wome na, ô wua fé ? » Nko’o na, « Amu jé ? » Kulu na, « Mbie bi, tame fo’o wua, nge minsos mia be Nko’o mi ne biañ ».

Nko’o ve bete akoñ ba mfek, a wua ébé yôp. Kulu ve fame vioé ne nge’eté ! Nye na, “Akoñ ba mfe’e mbe be ne jé ? Ke w’ate jô na, ô ne ngule ya bepe me fé ? » Nko’o a nga ye wu ôlun, ve bete Kulu, ve ne feleñ ! A wua ébé yôp. Kulu a to’é akoñ ba mfek ve zu kui ébé yôp, nye na, « A Nkok ». Nko’o na, « Me nyô ». Nye na, « Ye metin, ye mimbiaé, be nga fa’a bibé bina a jé ? » Nko’o na, “Mimbiaé”. Nye na, “Ya, liki’i, me keya ja”.

Nde Kulu a nga ke, ve tyi’i ke afan, kengenge ! a nga suane zene ya be Ze. Ve lum mvus zene ya ja dé, ve lumbu lumbu a ke be Ze. A ke suane be Ze, a nyin aba été. Ze a nga batane nye. Be nga laan ayôm minlañ. Kulu ve bômbô si, nye na, “M’adañe wô’ôyo mis”.

Mon étun, a nga lekan, “Heñ ! heñ ! Ze a nga vele nye, nye na, « A Kulu, jé ? » Nye na, “A Ze mo tat, ye beta bibé be ne bo wo fé va ?” Zen a, “Amu jé ?” Nye na, “eyoñ nlô wom ô nga bo ô yenek, ve be’ndi tit jale dina den”. Ve beta bômbô si. A nga beta lekan. Ze a nga vele nye, nye na, “Jé é bo ?” Kulu na, “Ke m’ate sili wo na, ye bibé bi ne wo fé va nge melam ?” Ze na, “Me bili bibé”. Nye na, “Nkele bi tame ke jii bie na ». Ze ve to’é mekoñ, Kulu a to’é ma mevok. Be ve lumbu zen, a ke suan mba’a bibé.

Kulu ve ji’a lôt ôsu, a nga ke a jii bibé. Ve ke kui vôm a nga li’i Nko’o, a zu koé na, Nko’o a futu ébé. Kulu ve bôé ke ñyôn : “A ! Tya ! Soñ ! A Ze mo tat, za’a ke avô, Nko’ôfutu ébé”. Nko’o a ye jô na, “Tame tebe, me tame kat”, Kulu na, “Lumuk, a Ze. Nsem ! Tit j’akôkobô. Tit j’abo é katek”. Ve ba’a ke akoñ. Be nga mane wôé Nkok, nde be nga vaa Nko’o ébé, a be’e mimbôñ. Ane be nga ke ja. Be nga ba Nkok. Ze a to’é énam, a to’é fe mebe’e, a kee Kulu. Nde Kulu a nga ke ja dé.

Ane Kulu a nga lo’o Nko’o ana.

 
 

Page d'Accueil Copyright © 2007-2011, Culture Vive