Page d'Accueil

Kulu ba Mian

   

A nga bo na, Kulu ba Mian be nga bo mesengan. Miane na, “Oyôm ômvo’o Kulu, ayôm bitune mebo ; mebo me ne wo mana ane ntui azôé. Ye wo ke ô ne fo’o mate ?” Kulu na, “Beta mebo be ne wo ayap ayape ba, ye ô ne koane me mbi ?”

Mian ve fame vioé, nye na, “A Ku, mbile wu ô nga so wo vé ?” Kulu na, “Ke me ne wo dañ mbile biyoñ biyoñ ». Nye na, « Bo’o bi tame tame sengan. Kulu na, « Sa fe den, za’a akiti, bi sengan ». Nde Mian a nga kôlô, a kele ja dé.

Ali’i Kulu a nga li’i na, ve soo bone bese a beyale bese. Ve ke a jô’é wua wua zenezen, bese be bili ékanga ba asu. Ve ke ôyap, a ke a telé wua wua. Nde a nga bulan, ve zu tabe si.

Bia tyé, Mian ve vam. Nye na “Kulu a ntôé ?” Kulu na, “Me nyô ». Nye na, « Nke ». Kulu ve vam atan. Nye Miane na, « Tebe’ôsu ; wo ô kele zenezen, me ke m’ake feñ, amu m’ayem afane dam”. Nde be nga bumu mimbi, be be be be ! Mian a ke tebe na, nye na, « Kulu a ntôé ?” A vô’ôlô ôsu na, “Me nyô”.

Eyoñ éte Kulu émien a nga li’i a bô si ja dé. Mian ve bumu mbi, be be be be ! Ane a nga ke tebe na, nye na, « Kulu a ntôé ?” A vô’ôlô ôsu na, “Me nyô”. Mian ve bumu mbi, be be be be ! A ke tebe na, nye na ‘Kulu a ntôé ?” A vô’ôlô ôsu na, ‘Me nyô”. Mian ôyem ô njô’ô ve amañ, a nga ye vi’a wu abuk. Nné ane a beta fam mbile na, abo ndi ômañ, wôs ! Ne ngeñelé ! abo d’abu’i. Mian ve ku kayale, te fe akôlô ya kôlô. Nde Kulu a nga so, a koé na Mian a bô. Nye na, “A Mian, a nto aya ? Ke me nga jô wo angô’é na, bia wo bi se ngule ya vendan mimbi. Za fe a bô nyô”.

Ane Kulu a nga dañe Mian mbil ana.

 

 

 

Page d'Accueil Copyright © 2007-2011, Culture Vive