Page d'Accueil

Ngbwa Kulu ba Avembe

   

A nga bo na, Kulu ba Avembe ve bo ñgbwa. Nde Kulu a nga ke yen Avembe. Avembe ve loene bongô, nye na, « Biane beta nnôme kup ». Nde be nga bi. Avembe ve loene nga, nye na, “Kele yame kup éte mvaé, mô Kulu a soya”. Ane minga a nga mane yam aval ane nnôm a nga jô. Eyoñ bidi bi maneya bé, ane be nga kat Avembe na, « Bidi bi maneya bé ». Nde Avembe a nga ke nda, ve nyoñe bidi, a ke beté ôyap akañe yôp.

Nde a nga zu jô Kulu mvôé jé na, “Za’a ke di ékon nda”. Ane Kulu a nga kôlô si a ke nda. Eyoñ Kulu a nga kui nda, a kôban nduan, a fombô si, te ke yene bidi. A ke fombô akañe na, a teme na bidi bi mbete. Kulu ve tebe nja’a yôp, a vet nté na, a to’é bidi, te ngule ya kui akañe yôp. Kulu a mane mefe’e mese, te ke ngule ya kui akañe yôp, a nga ye vi’a wu zaé. Kulu na, « Hé yi ! Amu jé Avembe a kôme kpwe’ele me ana ? » nde a nga bômbô si.

Mam me tyé, nde a nga to’é ôbo mfe’e vié, ve tyelé étu, a kui atan. A nga loen Avembe nye na, « Mô a ntoé ? » Avembe na, « Me nyô ». Nye na, « Me nga ke ja, me nga dañe li’i bon be wô’ô me ayôñ angô’é. Jam ete me nga tame ke. Ve ô tame ji’a zu jome me melu mebaé ma ». Avembe na, « Ya, ô wulu’u mvo’é, ô sili’i me Nya Bibôtô. M’aye fo’o zu melu mebaé ma ». Nde Kulu a nga ke. Ane Avembe a nga ke nda, a zu koé na bidi bi bete akañ. Ane a nga to’é, a ke bie nda, ba be bone be nga di.

Nde a nga tabe, melu mebaé ve kpwan. Ane Avembe a nga kôlô si, ve mane kômesan. Ane a nga ya’an nga ba be bon, nye na, « Me nga tame ke jome Kulu”. Be na, “Kele”. Avembe ve futi nyôle zen, a nga kui be mvôé  jé Kulu. Kulu ve ke wubane nye, be nga ke b’akolan aba, ve ke tabe si. Be nga laan minlañ.

Nde Kulu a nga ke nda, ve loene Nya Bibôtô, nye na, “Wô’é beta nnôme kup a dañ anen, ô yame nye mvaé, mô a soya”. Ane Nya Bibôtô a nga bo ane Kulu a nga jô. Eyoñ bidi bi nga mane bé, ane be nga kate Kulu. Nde Kulu a nga nyoñ ntumane bikô’ôla bikon, a sôé mendim ésua, ve telé si. Nde a nga loen Avembe, nye na, « Sôbe’mo, ô di bidi, amu w’ayeme na, môt a didi bidi biam a mvine mo, ve mo me to nye nya mfubane ».

Avembe ve sômbô si, a nga sôpe mo. A ke fombô mo, ve ne viu ! Ntuman asup ôse ve man, a ke fombô mo, ve avale da. Avembe ve kat, te fe yeme jam a bo’ok. Kulu na, “A mô, w’aye bo aya ? Mo te fup, bidi biam ke étyi ya di a mvin ése mo”. Avembe na, “Me bo fe aya ? Me lô fo’o na, mo mam m’avo’o fup”. Nde a nga kôlô a ke ja dé, a li’i bidi bi tele. Ane Kulu a nga nyoñe bidi, ba be bon be nga di.
Ane Kulu ba Avembe be nga yemane mefe’ana, mfa’a ya ñgbwa jap.

 
 

Page d'Accueil Copyright © 2007-2011, Culture Vive