Page d'Accueil

Atiñ Kulu ba ntyi

   

A nga bo na, Kulu ve lu’u minga. Nde a nga jô ntyi na,

« Minga wom me lu’uya nyô, a mentyi, w’ayeme na me diñeya nye. Môs w’aye wu, bia wo bi aye ke soñ bebaane”.

Nde éyoñ Kulu a wô’ô tabe, batitit ase a yeme na, Kulu a bili atiñe na, a beba’alane jam. Nde Kulu a nga ke ja dé.

A tabe na, abe melu, foé é nga so na,

“Nyo ntyi a kon”.

Kulu nye ngale na,

“Kômesa’ane, bi ke jom éso”.

Ngal a mane kômesan. Ane be nga baman, wô ! be ntyi. Ane b’akui be ntyi na, ntyi ve ba’a mo, mieññ ! Miñyôn mi kutan. Etun é nga beme na, be nga fa’a soñ, Kulu na,

“Mi nene’e soñ, bia mentyi bi nga li’ atiñe na, bi ne fo’o ve soñe jia. Me tame ke ya’ane ja”.

Nde Kulu a nga bulane ja dé. Ve na, mfa’ ôbo mfek, me ntu’ angunda, a ke fulan ntu’u nkoé, ve bamane biôm bite bise. Kulu a nga jimbi be ntyi, a nga zu a yôn. Be na,

“Be za’a mbim”.

Ane be nga soo mbim. Be futi mbim soñ, be na,

“Kulu a ntôé ?”

Nye na,

“Me nyô”.

Nye ngale na,

 “Yaka’ane ma”.

Ngal a nga nyoñ biôm, a nga ve nye. Ve ka’a biôm bite bise beta mbe’e anen. Ve a nga ke ne vôñelaan ! vôñelaan ! vôñelann ! Nde a nga kui soñ.

Be na,

« Be maneya futi mbim ».

Kulu a nga yôn, nye na,

“Jé m’akôsa beta yôn ?  A minga wom, mia be bon mi tabe’e mvo’é. O kate fe Nya Bibôtô na, “Tabe’e mvo’é”. Ma me keya fo’o”.

Ve ne sas ! Kulu a ku sôñe yôp. Ve ne sa’aa ! a sa’a soñe yôp, te ngule ya tôlan. Be na,

 « Soñ é boya mbatañ, be tame vaa Kulu ».

Nde be nga vaa Kulu. Be nga beta kô’ôlane soñ. Be na,

« A Kulu, za’a lôt”.

Kulu na,

“A bo be tat, jé é bo ? Ye mi vuaneya atiñe dam ? Ane bia be mia bi nga taté tabe, ataté ane me nga so nkôl Otu’utu, a zu kui Bite’ebo mu, môs mbé mi nga yen ane m’aba’alane jam ?”

Be na,

 “Kulu a bele. Eto ése bi atetabe Kulu, a wô’ô fo’o bo te ba’alan. Nnôm atiñe wé le. Nnye ate a te fo’o ke soñ.

 
 
 

Accueil Copyright © 2007-2011, Culture Vive