Page d'Accueil

Kulu a nga mane di nsa

   

A nga bo na, betit be nga wô’ô zaé. Be nga jeñe vôme ya yene bidi. Nde be nga yene bensa, be nga mane faté, ve soo be, be nga yam. Nde Kulu a yeneya beta ékulôñ, a to’é a futi mfek. Nde be nga tabe. Nsa a nga mane bé. Nde Kulu émien a nga ke nyoñe bensa, amu batiti ase a nga bo ko woñ éyoñ b’akômbô ke nyoñe bensa, amu beta alôñ ate a nga bo a kobô’ô be. Nde éyoñ be nga té nsa nduan, bese ve tabe élunga, be nga taté ke b’atye’e nsa.

Kulu a jô na,

“Tyeka’ane ma”.

Be na,

« O tame fe yange ».

Nde be nga dutu metôk, be nga di nsa. Kulu a ye zu ke wo, be falé Kulu wo fé. Nde Kulu a nga wô’ôlun, ve ke fô’ô ôbo mfe’e vié. Ekulôñ ve vaa tyiñ abum. Akobô a kobô ana, batiti a nga dumbane mimbile fé, be li’i vie’e nsa ô tele. Ali’i Kulu a nga li’i, ve a nga mane di nsa. Amane a nga mane di nsa, nde a nga kôlô, ve ke nyin ñbwa’afup ébol nko’o si, liit ! A nga nyoñe biyaé, a nga min. Ve nyoñ ôyôm éyo, a lum abo si , bone metyi be nga kui.

Batiti ase a nga so, a zu koé na, vie’e nsa, te ke fe jôm. Be yôné. Bese ve mane sulan, be na,

“Kulu, nnye a né ?”

Be nga loen,

 “A Kulu–o ! A Kulu o !”

Kulu a yebe,

 “O !”

A nga zu, ve zu suan be nga to. Be semé, be na,

“W’ate ke ôyape vé ?”

Nye na,

“A Zo’o, mo tat, jôké’é ma. Nde woñ w’ave môt ngule nyô. Meya me mba’a te mate, ke m’ate mate. Eyoñe ji ve ane b’awua mfendek. Eyo ve ke me nyin abo”.

A liti be abo, metyi me nga kui abo si. Be na,

“Kulu a ju’uya fo’o”.

Ze na,

“Jé é ne Kulu abum ana ?”

Nye na,

“A Ze, w’akpwe’ele ma. O wô’ô bo me nalé amu jé ? O nga wô’ôya na, beta biyaé m’ate min, wôna abum e ne me nlem ».

Ze na,

 « Heñ ! Kulu, m’ayeme wo, aka’a abume di !”

Kulu na,

 “Yange’e yen”.

 Nde a nga sômbô si, ve te’anyu,

« M’adidi éyaé ya bôbot, boot ! »

Eyaé si, biok ! A beta jô na,

« M’adidi éyaé ya ‘bôbot, boot ! »

Eyaé si, biok ! Kulu a nga mane yô biyaé. Nde a nga yô ôyôme mon nsa, Nye na,

« Oyôme tô’ô nsa m’ate tyek, ñvie vi ».

Kulu a mane di nsa ana.

 
 

Accueil Copyright © 2008-2011, Culture Vive