Page d'Accueil

Mongô ba Emômôtô

   

A nga bo na, môt ve tabe.  Ane a nga lôñe ja, beta afan a to nye nkôle yôp, môt te ke afan ete, be na, “Ebibi é ne été”. Nde a nga biaé mon. Mon a mane bo nya môtô.

Bôte bese, te ke môt a nga tyi’i zen afan ete.

Môse wu mongô ate na, « Aka’a abui wôé e ne nlame di ! M’atame ke m’ajeñe wôé ». Ve dutu ôvôn, a fa, a nyoñe fe nsik, a mane wô’ô mbom. A fane mva’an, ve lumbu afan. A li’i mfa’a mefan besom be nga bo be kelek, ve viane telé asu afan e mbe étyi. Ve nyin afan été. A zu koé na, ve na wôé wuna ô lé va, wuna ô lé va, wu mbo’ ô lé va. Mongô ve tyi’i nko, a mane tiñeti ôvôn, a tyelé mva’an. A tyi’ atu’ avok, a nga tiñeti mbiañ. Ve wua mo yôp ! A ke kui abôñe wôé, ve tebe. A nga si’i nsik, nduan ve kui. A nga mane kôban anyu abôñ. Ve a nga ba’é, tôm ! tôm ! tôm ! A nga la’ate wôé, a futi nkoé.

Mfa’ane a ngenan a la’ate’e, a vô’ôlô afan akôé na, “Za a ba’é ? Za a ba’é ? Mvaé nyô, mvaé ! Mvaé nyô, mvaé !” Beta môt ve suan élé si. Nye mongô na, “Wu’a ôvôn”. Mongô ve wua ôvône si. Emômôtô ve ka ôvôn, a ke jô’é si. Nye na, “Wu’a fe nkoé wôé”. Mongô ve suu nkoé wôé. Emômôtô a ka nkoé wôé, a kôme ke telé. Nye na, “Womien, kpwa’a he”. Mongô ve suu mo, ne lep ! lep ! lep ! azu. Emômôtô ve te’e mo, kpwep ! A ka mongo, ve kôme nye ke telé. Nye mongo na “Mvaé nyô, mvaé ! Toké’é biôm biôé bise, kele ja dôé. Te beta zu éyoñ éfe ». Nde mongô a nga baman nkoé wôé, a ôvôn, ve lumbu ja. A kui jale na, be nga di wôé.

A bômbô na, melu mela, mongô na, « Me tame beta ke jeñe wôé”. Ve dup asu afan, a ke suane vôm a nga bô’ô wôé. A nga bet élé wôé évok, a kui abôñe na, a nga mane si’i nduan. Ve bete ôvône yôp, tôm ! tôm ! tôm ! Vububu ! a tulan. A nga la’ate wôé, a nyoñ a futi nkoé. A vô’ôlô afan akôé na, “Za a ba’é ? Za a ba’é ? Za a ba’é ? Abé di, abé ! Abé di, abé !” Emômôtô ve suane tin élé, a lô ane mongô a bete yôp.

Nye na, « Za nyô ? » Mongô na, « Ma ». Nye na, « Ye me nji kate wo ôjane na, te beta zu ? » Mongô na, « O nga kate ma ». Nye na, « Yaa, wu’a ôvôn ». Mongô ve wua ôvôn. Emômôtô a vit ébebas, ôvôn ô lôté, kpwem ! akok, bitune bibaé. Nye na, « Wu’a nkoé wôé ». Mongô ve wua nkoé wôé. Emômôtô a vit ébebas, nkoé ô lôté, miôññ ! w’abôlane si. Nye na, « Womien, su’u mo ». Mongô ve suu mo. Emômôtô a vit ébebas, mongô a lôté, bububu ! tiñ ! ndi ; a bu’u na bitune bibaé. Ve ne mieññ ! boo anga loñe jôé. Ane Emômôtô a nga bulane ja dé. Ane mongô a nga wu ana a melo.

Mongô nyi a nga wu étome melo.

 

 

Page d'Accueil Copyright © 2007-2011, Culture Vive