Page d'Accueil

Môt a nga bo nyoñe betit

   

A nga bo na, betite bese ve baman, be na,

“Bi atame ke mvan”.

Be nyoñe mevot, a bidi, nde be nga lumbu mvan. A kui afane na, be nga loñe bibem, nde be nga bômbô. Bia tyé, be nga be’e mevot, ve lumbu afan. Be nga ya abiôm. Tit é nga tu’i awu. Nde be nga so, ve suane bibem. Be nga mane ba tit, be nga ke b’ayam.

Bia tyé, be dutu mevot, be na,

“Za a li’i a ba’ale’ meban ?”

Ojoé na,

“Ma”.

Ojoé ve li’i a to. Bôt a biôm, wô ! Mon étun a beme na, beta môt a nga so, a suane bibem. Nye na,

« Za a ne bibeme mu ? »

Ojoé na,

« Ma ».

Nye na,

« A Ojoé, ye w’ayeme fo’o abô’ô betate be nga lik ?”

Ojoé na,

“M’ayem”.

Môt a nga kute fas, Ojoé a nga jem. Nye Ojoé na,

“A ke w’atyele”.

Ojoé a nto na, ane a nga tyelé, a ke ane nkpwa’a si li. Ali’i môt a nga li’i, ve a nga wôlô betit, wô ! ja dé.

Aso Ojoé a nga so na, a zu koé na, a maneya nyoñe betit. Ojoé ve tabe fe’e ne vema ! Ane a ngenan a tele, nsamba abiôm ô liti asu. O nga suane bibem, bibem ve ne ngeñ ! Te ôfuse tite via. Be na,

« A Ojoé, tit é né ? »

Nye na,

« Jôka’ane ma. Aso ya fé fo’o di. Nté ane mi nga li’i me vana den, me nji té abo na, m’ake vôm. M’adimi na, a ke fé, me nga vi’a zu koé be maneya soñe ti ».

Nde be nga mane sulane bese. Be nga beta mane ba betit, ve mane yané.

Bia mam me tyé na, be na,

“Za a li’i va éyoñe ji ? »

Sô na,

« Ma ».

Nde be nga mane lumbu. Beta môt ve beta so, ve koé Sô. Nye na :

“A Sô, wo w’aba’ale mebane ma ?”

Sô nye na,

“Eññ ».

Nye na,

« Nkean ôyo ô nga bo Sô, ye wo ke w’ayeme jem abô’ô betate be nga lik ?”

Sô na :

“Ke ma m’adañ ».

Ve a nga kute fas. Sô ve suu nyôl nseñ, a nga ke a tek, febebe ! Môt a nga mane soñe tit. Sô a nga so. Nye a so, nsamba abiôm w’aso, a zu koé na, meban ve ne vaé !

“A Sô, tit é né ?”

Nye na,

« Jôka’ane ma »,

A nga mane kañete be. Nde be nga ba betit, ve mane yané betit. Bôte bese be nga to abiôm, ve mane li’i nalé, te ke môt a yeme ba’ale tit.

Môse wu Kulu na,

“Ma m’ali’i”.

Nde Kulu a nga li’i. Be ve mane ke abiôm. Mon étun a beme na, beta môt a liti asu. Nye na,

« Za a ne bibeme mu ? »

Kulu na,

« Ma ».

Nye na :

« E ! Nde Kulu mo tat a ne va. Ye ô ngenane fo’o ô yeme’ abô’ô bi abo bi jemek ?”

Kulu na,

« Ke ma me bili bili ese ».

Môt a nga kute fas, Kulu ve fôte nyôl nseñ. A tyiñelan, ve dis e to môt a né. Nye na :

“A Ku, w’angenane ke ô tu’a yeme jem, abô’ô ve tyiñelane vôme wua”.

Kulu na,

“Jôké’é, ke nne m’aboé boé zo’o va”.

Ve Kulu a tyiñelan, a bebe’e ve nye.

Kulu avô’ôlô a vô’ôlô, a wô’ ane menyiñ m’azu m’ajô. Bôte ya abiôm be nga zu. Kulu nye na,

“E ! Tame zu fombô va”.

Môt ve so, Kulu a kui bikô’ôla. Nné ane môt a ye ke wo na, ve ne kpwep ! Kulu a ka nye ônyu. Onyu ô nga ye tyi’i. A nto na, môt a bibi nye si, nye na :

« Mesebe ! Ane me nga so nkôl Otu’utu, m’abôbôlé”.

Ve bôé ñyon anyu :

« A bôt abiômô, za’an, me bili a mo, za’ anô”.

Môt a vuñ, te ke bo jam, ve Kulu a bili. Onyu ô nga ye vi’a tyi’i. Awô’ô bôt be nga wô’ô ñyôn, be nga zu mimbi. Be nga suane meban, a zu koé na, Kulu a bili nye ônyu. Jolololo ! Bese b’abi, be nga kômôtô mimbeñ.

Ane Kulu a nga ba’ale tit ana.

 
 

Accueil Copyright © 2008-2011, Culture Vive