Page d'Accueil

Mvom ba Kpwañesan

   

A nga bo na, môt ve mane lam beta ékuti mbil Mvom. Nde Mvom a nga vam, ve timbi beta ékuti ate, Mvom a li’iya bebé ya wu. Nde Kpwañesan a nga so, a zu koé na, Mvom a yeme ékuti. Mvome na,

“A Kpwañesan mojañ, za’a vaa ma, me wuya”.

Kpwañesan ve kui, a nga fendé meko’o me nga titi Mvôm ékuti yôp. Eyoñ a nga mane fendé mekok, ve nyoñ mbima’a, ve bete ékuti, a beté afa’a yôp. Nde Mvom a nga kui ékuti si. Eyoñ a nga mane kui, ane Kpwañesan a nga bulane suu ékuti.

Eyoñ Kpwañesan a nga ye ke, Mvome na.

“W’ake vé?”

Nye na,

“Ke m’ake ja”.

Mvome na,

 “Momo, me ju’uya zaé, tebe’e valé, me mine wo”.

Kpwañesane na,

“A Mvom, za ajô di ? Nge me vaa wo ékuti, w’ate ye wu, ô viane jô na, “Tebe’e, me mine wo !””.

Kpwañesan a vale mbi, ba Mvom aba’atane da. Ve jimbi be Ojoé, Ojoé na,

“Jé ?”

Kpwañesane na,

“M’ate zu koé Mvom a tii ékuti, nye na, “Me wuya, za’a tiine ma””. Nalé m’ate tii nye. Eyoñ m’ate kômbô kôlô, a viane jô na,  “Tebe’e, me mine wo”. Mbil ôte a zu a titane me wu”.

Ojoé na,

 “Mvom, nnye a kabe”.

Kpwañesan ve lôt mbi, ba Mvom aba’atane da.

Be nga jimbi be Sô. Sô na,

“Jé ?”

Kpwañesane na,

“A Sô, jôké’é ma. M’ate zu koé Mvom a tii ékuti. Nye na, « A Kpwañesan, me wuya, za’a tii ma”. Nalé m’ate tiine nye. Eyoñ m’ate tiine nye a viane jô me na, “Tebe’e valé, me mine wo”. Mbil ôte m’azu m’awu wu””.

Sô na,

 “Ke Mvom a kabe. Ye mvaé j’abôbô ébaé ?”

Nde Kpwañesan ve mane betite bese, ve jô nye avale da.

Ane a nga kui be Kulu. Kulu na,

“A Kpwañesan, jé é bo ?”

Nye na,

“A Kulu, jôké’é ma. Jame di e nto me melu mebaé den, me kate’e di jôme ya di. Me nga zu koé Mvom a tii ékuti.

Nye na,

« A Kpwañesan, za’a tii ma, me wuya”. Nde me nga tiine nye. Eyoñ a nga kôlô, a viane jô me na, “Tebe’e valé, me mine wo”. Atitan ete nde a zu titane me di”.

Kulu na,

 “Ke Mvom a kabe. Tame tebe valé, me wô’ajô te”.

Nde Mvom a nga so, ve suan. Kulu na,

“A mvom, ajô e ne aya ?”

Mvome na,

« Kpwañesan a nga zu koé me tii ékuti, ane a nga tiine ma. Nde a nga jô na, a nga ke ja dé. Nde m’ajô na, momo, a tebe’e, me mine nye. Ajô te m’azu m’atitane nye ».

Kulu na,

« A Kpwañesan, w’ajô aya ?”

 Kpwañesane na,

“Ke m’ajô na, me nga bo nye mvaé, a viane jô na, a mine ma. Nde fe’é jañeya ma. Ajô te m’ajeñe môt a tyi’i  bia ajô ».

Kulu na,

 « Ke w’aku. Mvom, nnye a kabe. Ye mvaé j’abôbo ébaé ? Jame da, m’akômbô mi tame ke liti me vôm mi ato ».

Be na,

« Ya, nkelek ».

Nde be nga futi nyôle zen.

A ke suan ékuti, a zu koé na, ékuti é bô si. Kulu na,

« A Kpwañesan, nne ékuti é nga to aya ?”

Kpwañesan ve ke to’é mbima’a ékuti, ve bete wô ékuti, a mane kolé ékuti, a nga vise meko’o mese me nga to été yôp. Kulu na,

“A Mvom, nne ô nga bo aya ?”

Mvom ve nyin ékuti si, ve bis ékuti, zis ! j’aku Mvome yôp. Mvom ve li’i nlô nlô ô dene atan. Kulu na,

« Ye nne ô nga to nalé ? »

Mvome na,

 « Eññ ».

Kulu na,

« Tame kôlô » 

 Mvom a vuñe na, a kôlô, te fe akôlô. Nye na,

« Ye me ne fe ngule ya kôlô va ? Jika’ane zu bete ékuti avô ».

Kulu na,

 « O nga bo na, Kpwañesan a tiineya wo ékuti, ô viane jô na, « Tebe’e, me mine wo ». Mvaé j’abôbo ébaé. Ajô te éyoñe ji, ô nto vôm wo ô nga to, nde m’ajô na, « Liki’i ». Kpwañesan a né ? Kele ja dôé”.

Nde Kpwañesan a nga ke tabe si. Nde Mvom a nga li’i a tii ékuti.

Ane Kulu a nga tyi’ajô Kpwañesan ba Mvom ana.

 
 

Accueil Copyright © 2007-2011, Culture Vive