Page d'Accueil

Ngbwa Abañ ba Ze

   

A nga bo na, Ze ba Abañ be tabe ñgbwa. Nde Ze ba Abañ be nto. Nyôna a biaé bon, nyô mbo’a biaé bon. Bon be nga na ñ. Ve na, ane Abañ a ke minneñ, aso a so, a zu koé na, mon a nga jemban.

“A Ze, mvoé jam, mon a ke vé ?”

Nye na,

“M’ayem, ke me ke m’aso minneñ”.

Nde Ze a maneya di. Abañ a beta ke minneñ. Aso ya a beta so, a zu koé na, mon mbo’o momo, Ze a betaya mane di. Ve nalé melu mese. Bone be Abañ bese meñ ! b’aman. Nde Abañ a nga li’i a to.

Abañe na,

« M’ayeme na, Ze mo tate, a bo me aya ? »

Nde Abañ a nga taté tabe kindik, ba Ze be bo be tabe’e. Nde Abañ a nga jô na,

“Sa ke nlam ya tabe wu”.

Abañ mas !  minto’o wô ! Nde a nga kui beta ôsôé ; mendim, jôô ! ve ke tabe anjeñe si. A kôme na, nlam. Abañ a nga biaé bon, ba be bon ve tabe. Be nto.

Nde Abañ a nga kôlô, a kele minneñ, bone ke ve li’i. Bon be nga zu b’ajo’anjeñe yôp, ve suan ébômenselek, be nga vôé. Ze ke a keya minneñ. Bone be Ze be ve kôlô, be nga zu b’avôé éwom ôsôé. Be nga kui ébômenselek, a zu koé na, bone be Abañ be vôék. Be na,

“E ! A bemô, nne Abañ a nga zu minto’o nne ? »

Bongô na,

« Eññ ».

Nde be nga latane bivôé ébômensele’e va, ve be nga vôé. Ngum nté môs, be vôék. Ze a so, a nga je ñe bon, te ke ji’a yen. Abañe fe a soé, a nga jeñe bon, te ke ji’a yen. Ngô’é é nga ke, nde bongô be nga kandan. Bone be Ze be nga ya’ane bone be Abañ be na,

“A bemô, bi keya”.

Be na,

“Kelan, bi aye beta zu tôban bivôé akiti”.

Nde be nga ke. Bone be Ze be kui be nyia, ba be Abañe ke be kui be nyia.

Ze na,

“Yeo ! a bon, mi ato vé ?”

Bongô na,

“Nde éyoñ Abañ a nga ke va, nde a nga ke biaé abui bon. Bemvôé bangane bete bia bebe bi ato bi vôék”.

Ze na,

“Jéa ! A vôé bone be Abañ ?”

Be na,

“Eññ »

Nye na

“Nde mi ne bongô–é ?” Mi awô’ô na, m’anaa mia. Ke a be, bidi le, bidi. Nne a ne na, éyoñ mi aye beta tôban akiti, ve bian. Jôm m’ajeñ, ke nje le ».

Bone be Abañ ke, a ke kui be Abañ, nyia na,

“Jé j’anyume mia nyôl ane ze ?”

Be na,

“A na, ke bia bemô bi ate jaé vôé, bone be Ze”.

Nye na,

“Yé ! A bone bam, ke mi fameya vôm mfe ! Mi awô’ô fe na, bebenyoñ be nga mane jañ, te môt mfe, ve bôt mi aso vôé be le. Te beta vuane kui bebé éwome kindik, mi tabe’e fo’o ve’anjeñe yôp. Be kôsa mia du’u na, ‘Za’an’, te beta kean. Nge be loene mia, mi jô’ô be na, ‘Melep éso ba nyua b’ate lepe mia mam me ngô’é, mme mete fe tate ba nane b’ate lepe bia’. Ane mi kui bebé, mi yeme’e na, mi wuya”.

Nde bongô be nga wô’ô nyia ba ésa.

Bia tyé, Abañ ve ke minneñ, Ze ke ve ke minneñ. Bone be Ze ve mane kômesan, be na,

“Be nga kate bia na, bidi bi, a nto fo’o ve bi aye bi”

Nde be nga suan ébômenselek. Bone be Abañ be nga zu b’amvieñ anjeñ yôp. Bone be Ze be nga  loene be,

“Ya, a bemô, za’an, bi soya”

Bone be Abañe na,

“Bula’an, mi ke ja denan. Bi aye fe beta kui wôé. Melep éso ba nyua b’ate lepe mia mam me ngô’é, mme mete fe tate ba nane b’ate lepe bia mam me ngô’é”.

Bone be Ze a kôsa fe wondô be, be te ke fe bebé ya zu. Nde bone be Ze be nga bulan, bone be Abañe ke b’abulan. Ze a kate bi Abañ ana. Ane Abañ a nga yale bon a fek. Nalé bone be Abañ be nga nyiñ amu mewôk.

 

Bi ayiane bo bebiaé bangan mewôk, aval ane bone be Abañ, nalé bi aye nyiñ.
 

 

 

 

Accueil Copyright © 2007-2011, Culture Vive