Page d'Accueil

Ngômô ba mone wé Lindi

   

        .

Ngôm a nga biaé mon a yôlé nye joé na, Lindi Ngômô. Ve éyoñ bôt b’aloene nye na, Lindi Ngômô, te ke yebe, ve vini a tina’an ésa. Ane a nga kôlô jal ésa, a dañe na, asôé asaman. Ve ke tabe fé été, ba ngale bebaé. A mane lôñe ébem, nde a nga kôlô na, a ke tyi’i minloñ. A ke kui zene na, a zu koé na, ôkpweñ ô tii ôlam. Lindi ve tii ôkpweñ. A tyi’i fe nloñ, ve zu ja dé. Eyoñ ngal a yen ôkpweñ nye na,

« Za a te wôé ôkpweñ ? »

Nye na,

« M’ate yen ô tii ôlam ».

Ngale na,

« Jôké’é éza ôkpweñ. Be nji bo na, ô za’a mintok, ô za’a fe mintañete”.

Lindi na,

“Nge nalé, m‘ayiane mane ba ôkpweñ ».

Ane a nga mane ba ôkpweñ, ve nyoñ ôse, a mane fiti ékôp. Nde a nga nyoñe ve ések, a jô ngale na,

« Bubuk, bi di ».

Ane minga a nga mane bupe je.

Eyoñ be nga mane di, a teme na, môt a mbe melam ve suan. Nye na,

“Za a so afan akôé li ?”

Lindi na,

“Ma”

Nye na,

« Za a te tii me ôkpweñ ? »

Lindi na,

« Ma ».

Nye na,

« O ne vé ? »

Lindi na,

« Toké’é, ñvie ô tyele le ».

Môt ve to’é, a kuli, a mane fombô tit ése, ve te yen ések. Nye na,

« Ese’ é né ? »

Lindi na,

« Nje m’ate di ».

Môte na,

« Jéa ! Ye môt mfe a bo a ja’a me ése’e ya ôlam ? »

Nye na,

« Ese’ é né ? a nlem, ése’ a nlem, ése’ a nlem ».

Eyoñ a nga jô nalé, abui minsamba ve zu sulan, jale ve jaé a bôt ne lut, akekui Lindi a nji fe yen adili jô, nge vôm ya tabe.

Ane ngal a nga jô na,

« A nnôme wom, wo ô nga bene tinan éso, éyoñe ji bi abo aya ?”

Nnôme na,

“A nga wom, jôké’é a, m‘ayeme na,m ‘abo aya ?”

Be ngenan be jô’ô nalé, môt ve so, nye na,

“Ese’e a nlem, ése’ a nlem, ése’ a nlem”.

Eyoñ jam ete e nga jaa be fek, minga a nga bulane be ntyi, ésa Lindi, a kate nye na,

“Bôt be jaéya bia jale bi nga tabe, étome ya Lindi a nga di éza ése’ ôkpweñ. Bi nto melu zañgbwale den, te di jôm, ve ajô te. Nde m’ate zu sili wo na, bi bo aya ? »

Ntyi na,

« Ye me ne yalan ajô te, éyoñ éte Lindi a nga vini ma a jô na, a vo’o tinane ma ? »

Mbome na,

« A tat, ko éngôngo. A kôsa bo a ne asu’u nalé, tame jibi”.

Eyoñ a nga jaé ye’elan ntyi, ane ntyi a nga wô’ô nye. Nde ntyi a nga bi kabat, a wôé je, a nyoñ ések a afus afe, a bupe jôm a bupe fe môm mefe. Eyoñ a nga mane bo nalé ane ba mbom be nga ke.

Eyoñ a nga kui, a zu koé na, bôt be jaéya ne lut. Môt ate ve jô na,

« Ese’ a nlem, ése’ a nlem, ése’ a nlem ».

Ane ésa Lindi a nga sili be na,

“Ve bôt be wô’ô di éyoñ b’ajô ajô ?”

Be na,

“A di”.

Nye na,

“Tameka zu dian”.

Ane a nga ve be môm mefe, ve nyoñe jôm ések, a li’i  e tele si. Nye na,

“Me tame ke woban”. Ve ke. Eyoñ a nga so, a zu koé na, be maneya di jôm ések. Nye na,

“Jôm d’atele va e ne vé ?”

Be na,

« Ke bi diya de ».

Nye na,

« Jéa ! Ye môt mfe a bo a ja’a me ése’e ya melam ? Be za’a kee je avô. Ese’ a nlem, ése’ a nlem, ése’ anlem”.

Eyoñ be nga yene nalé, be nga tabe ne vema, a jô na,

“Za aval ajô di ? Bi ate zu na, môte nyô a te di bia ése’ ôkpweñ, ve éyoñe ji, bia fe bi betaya tôban aval ajô di. Nge nalé, bi ayiane bulan ».

Ane bese be nga mane bulan.

Ane ésa a nga nyii mon avale di, vôm mon a nga bene nye.

 

 
 

Accueil Copyright © 2008-2011, Culture Vive