Page d'Accueil

Nka’a étam

   

A nga bo na, bôte ya Emominlañ be lôñ nlam mfa’a wua, bekôn be ke be lôñ nlam mfa’a mbok, mbamba étam a to be zañ. Beta ékuk a tele fe fefel étam, ngom nka’a é bete ntya éku’u yôp. Nde a nga bo bo’o na, nge bôte ya Emominlañ be zuya lape mendim, nné ane b’akôlô, nka’a ke a suan. Ve a nga bum étam, a ju’ulane je. Eyoñ a wô’ane bôte ya bekôn be nga zu b’asôk, ve wua nyôl éku’u yôp, wôs ! Aso ke b’aso, a vi’a koé na, étam é nto ve ne ju’ula–ju’ulan ! Be na, “Jé ji ? Ke bôte ya Emo be kpwe’eleya bia”. Mo mekoñ, ve be nga wosan. Bôt be nga vañ. Mon étun, bôte ya bekôn be zu lape mendim, étam mvo’é.

Ane bôte ya bekôn b’akôlô na, nka’a ve so éku’u yôp, ve suan étam. Ve a nga fu’ulu étam. Awô’a wô’ane bôte ya Emo b’azu b’akobô, ve wua mo éku’u yôp, wôs ! Ve akui b’akui ana, ve jombô ôsôé, ôsôé ô vi’aya bo ne fum. Be jii miñyôn. Bôt be kutane mekoñ, ve jimbi bekôn. Nbwa’é nga jô yôp. Bevañ be nga vañ. Nde jam ete e nga tyam bekôn ba be bôte ya Emominlañ melu mese.

Nde ôyôm mintyaña mongô éziñ ô nga kôlô, ngume môs ve ke sobô mfôm étam. Bôte ya bekôn be nga beta so, ve mane lape mendim mvo’é. Ane b’akôlô na, nka’a ve so éku’u yôp, ve futi mo étam. Ve ne bu, bu bu ! Awô’a wô’ane bôt b’azu b’akobô, ve wua mô éku’u yôp, wôs ! Bôt be nga suan étam. Ane be nga yône na, mongô vep ! A vam. Nye na, Tameka tabane bivô”. Ve ke loen ésa a bôt nlam. Nye na, “Zaka me liti mia jôm j’andeñele mia”. Nde be nga sulan étam. Mongô na, “Tameka fomban éku’u yôp, ntya ékuk ô ne anen. Beta nka’a a bete été, nye a ndeñele bia”. Bôt ve futi mo mimfan. Be nga lum nka’a, nka’a ve sotan a kpwele si. Nde ataté éyoñ éte be nji fe beta yen étam ndaman.

Ane bôt ba be bekôn be nga tabe mvo’é, te fe beta wosan.

 
 

Page d'Accueil Copyright © 2007-2011, Culture Vive