Page d'Accueil

Obo w’abo môt, ôbo vi abo ve môt émien

   

A nga bo na, môt a lu’u minga,  ane ba nye be nga tabe ôkañ bebaa, ve nda, ve ke mon aba.  Ane zaé é nga kui nlam ôte, bôt be nga jañ a zaé éte, a wu. Ba nga  bô alu, nye ngale na,

« Zaé nyina édañeya. Bôt b’awu nké, b’awu akôé. Me lô na, bi aye ke nyiñ. Ane tyé é lendé, bi tebe afan ndolom, ve mfa’a ôse bi aye ke, bi kelé ».

Tyé kpwa, ba ngale ve kôlô. Be yale ve fala’a jé. Be bômbô afan melu menyin, ve kui beta afup. Bikon bi vé yôp abima te ke yem. Be lô fe ôtita ô kuik, a ke koé na, môt a to étam étam. Ve bidi bidi, te ke ñyam. Beta mvendé môt, anen. Ane mongô a nga nyin, a tabe énoñ. Nye mongô na,

« W’aso vé ?”

Mongô na,

“Jôké’é ma, mfumbala’zaé a zuya kui si jam, bôt be maneya jañ a zaé. M’azu m’ajeñe ve vôme ya di, bia minga wom ».

Môt ate na,

« Me bili ve bidi. M’ayen mvaé ane me yeneya wo. Mia minga wôé, mi ke nda muli. W’aye yene betit, a ngon, a ôwôndô, bi ne abui”.

Ane be nga ke nda, ba nga, a ke koé na, bidi ne lut !

Nye mongô na,

“Nyo ngal a yamek”.

Minga ve to’é viek, a kele ôsôé. Nja’a é ngunu ngunu abui, meviek te jeñ. Ane minga a nga yam bidi, a bôé ôwôndô. Fame na,

« Bikon bi ne ane w’anye’e, ve kpwé ».

Minga ve mane yam minnam mibaé, ve tite tit. Nde a nyoñ nnam ô mbe anen, a kele wô aba. Wu ô mbe tyôtyoé, ba nnôm be nga di. Minga a ta’é ngon, a nga to’é minkôte mi tit, ve beta yame na, minnam mibaé. Wu ô mbe anen, a kee môt ate ; wu ô mbe ôbe abim, ba nnôm be nga di.

Nnôm ve wô’abé nlem, nye na,

“Minga wom a bo jame di a jé ? Môt étam aba, a viane kee nye ve nnam ô ne anen”.

Beta akoñ a nga soo nye mo, a nga jep akok. Nye ngale na,

“M’awôé mote nyô, bi li’i bi ja’a bidi bi”.

Ngale na,

“A nnô’wom, ajô te e ne momo. Môte nyô a boya bia étua mvaé. Zaé é nga kui si jangan, bi nji yeme na, bi ne di bidi. Nge bi kuiya be môte nyô, a nyoñeya bidi bié bise a keeya bia, w’ajô na, w’awôé nye amu jé ? Te beta vañ ajô te môs mfe ».

Ve môt ate a nyoñeya ta’a, ve zu aba, ta’a ne viôôôô  ! Avem a veme ta’a a wô’ajô se b’akobô. Ane a nga jô na.

“Obo w’abo môt, ôbo vi abo ve môt émien”

Mongô na,

“M’aye ke wôk, m’awôé nye”.

Ngale na,

“Te ke’é, w’aye ke nye wôé”.

O vô’ôlô aba na,

“Nyebebe ! Obo w’abo môt, ôbo w’abo môt, ôbo vi abo ve môt émien”.

Mongô ve to’é akoñ, nye na,

“M’ali’i me ja’a bidi bi”.

Akui a nga kui aba, ve koé na, a bô ôyo. Nye ve telé akoñ yôp. Ajô a nga jô na, a wua nye akoñ, môt na,

“A !”

Mongô émien ve luman akoñ, ve ne vek ! Si abôm, awu di. Ane nnôme môt ba minga be nga li’i be tu’u bidi bebaa.

 

Nge mongô a to wô’ô nga, ye ve a nga wu avale di ?
Mongô a wôé a melo mé a abé dé ana.

 

 

 

Accueil Copyright © 2007-2011, Culture Vive