Page d'Accueil

Oliñe Mimbô’ô

   

Oliñ a nga bo na, ve tabe beta kame wé été. Ve suu bengôme bé, ve na, b’adi mbôñe li, b’adi li. Nde Mbane Mongô, nnye ke a to nlam. A maneya li afup dé, a maneya bé mbôñ. Ngôm ve ne tus ! E nga kpwa nye mbôñe va. Minga a ye ke nyu’u mbôñ, ve koé na, mbôñ ve bifas. Nye na,

“A Mban, éyoñ ô to, ngôm é maneya mbôñ”.

Nde Mbane Mongô ke a ne angôndô ya nsélé éñgbwasa.

Nde a nga dutu bemvu bé, a nga jalé mengôñ. Ve nyoñe mekoñ, a fa,  a ôvôn, a nsik, ve tyelé étu, nde a nga lumbu, ve suan afup. Ve tya’a bemvu, bemvu be nga ke b’aboé. Mban a nga bendé bemvu. Be nga valé ngôm. Be lôtô ngôm, ngôm kpwe’elé ! Kame si. Oliñe Mimbô’ô ve nyoñ ngôm, nda été, liit ! A nyoñe ke bemvu a nga fet nda.

Mbane Mongô a vô’ôlô fe, te fe wô’ éduñ angôñ. Nde a nga suane kame va, a wô’ ane bemvu b’aduñe mengôñ mfa’a ya kame si. A loen, te ke’é. Nde Mbane Mongô a nga fombô kame si, a ta ane Oliñ a nyoñeya bemvu, a yemeteya be nda. Nde a nga bete tyiñ, nye na,

« A Oliñ, nge ô liñeya ngôme jôé, lôme’ me bemvu bam”.

Oliñe na,

« Nde m’abo me bo’o na, me biya jôm, me beta je suu ? »

Mbane Mongô ve nyoñe ôvôn, a nga ba’é mindi. Ovôn, fomolo ! Ô nga ke be Oliñ. Mbane Mongô na,

“A Oliñ, a nto na, ngôm ako’o si wôé, bemvu bame wôé, ôvône wôé, nge ô liñeya ngôme jôé, ke’e me ôvôn ba bemvu bam”.

Oliñe na,

« Te ke’é ».

Mbane Mongô na,

« Ane me nga taté tabe, me ngenan te jô’é jame dam amu na, m’akat njuk ».

Ve dutu fa, a nga ke a katé kam. A nga mane sepe mindik. A ye beta ba’é, fa sot ! Wôs ! Kame si. Oliñe fa, bap ! Mbane Mongô na,

« A Oliñ, me jaéya jô wo na, ke’e me biôm biam. Nge wo ô liñeya ngôme jôé, a nto éyoñe ji na, ô bili ngôme jôé, ô bili bemvu bam, ôvône viam, a fa jam ; bula’ane me ve biôm biam, ô li’i ngôme jôé”.

Oliñe na,

« Vana a ne te ke’é na, m’abulane wo jôm ».

Mbane Mongô na,

« Ma me wô’ô jô na, nté me vee, jôm é vo’o m’akat, nné ve me wuya. Nde Mbane Mongô a nga lumbu ja, ve a nga soo bôt, a minkôm, nde be nga lumbu afan. Bôt be nga ba’é mevise me nja’a, be nga futi mimbé mi kam, ve mane kôbane mi. Be nga telé minkôm, ve futi mo minkôm, be nga suk. A nto na, ôtita ve late kam. Otiñ a kele mfa’a wu, te ke asobô ; a beta ke li, te ke été. Oliñe na,

« A Mbane Mongô, jôké’é ma, me wuya ».

Mbane na,

« Ke ô nga jô na, w’abo ô su’u jôm ô bili’.

Oliñe a nyoñe fa, a lôme nye. A to’é fa, a daa mvus. Nye na,

“Su’ane minkôm”.

Minkôm mi nga jô yôp. Oliñ  a nga nyoñ ôvôn, a lôme nye. Mban a nyoñ ôvôn, a daa mvus. Nye na,

“Minkôm”.

Be nga su’u minkôm. Oliñ a nyoñe bemvu, a lôme nye. Mbane ve daa bemvu mvus, nye na, ôsu,

« Oliñ a nga dañe me kpwe’ele ».

Oliñ a nga ye wu, ve nyoñe bengôm, a lôme nye. Mban a nga mane wôé bengôm, a nyoñé, a daa mvus. Nye na,

“Su’ane minkôm”.

Kam é nga bolé. Oliñ émien a ye beta tyi’ilane na, vep ! A vam. Mban ve futi nye mo nyô, a nga wôé.

Ane Mbane Mongô a nga dañ Oliñ ana.

 
 

Accueil Copyright © 2008-2011, Culture Vive