Page d'Accueil

Ze ba Kulu be nga suñe minlam

   

A nga bo na, Ze a ke sôp nlame wé, Kulu ke a ke sôp nlame wu, ô to jôé na, Meyené. Nlame Ze na, Zaénetus. Ze te saé, ve langane ve nsôm. Kulu ke ve ke fa, a ôvôn, a nga saé bidi. Bidi bi nga boé zo’o nlam. Foé, fendeñ !

E nga koé Ze, be na,

“Avale bidi e ne be Kulu !”

Ze na,

« M’abô ajô dina aya ?”

Nde Ze a nga tabe, ve lôme bôt be Kulu, nye na,

« Vôm Kulu a to le, a ne éli’i tate a nga to. M’ayi mintañete a Kulu. Kulu a kôlô’ô”.

Nde Kulu a nga kôlô, a ke sôp nlam mfe, Meje.

Nde Ze a nga suan nlame na, Meyené, a nga di bidi. Kulu ve dutu fa ba ôvôn, a nga saé bidi. Bidi bi nga bo abui. Nlame Ze a nga li’i wu, zaé tus ! J’akui. Ze te saé bidi, ve nsôme mefan. Foé ve beta koé nye, be na,

« A Ze, avale bidi Kulu a yô Meje ! ».

Ze na,

« Me bo aya éyoñe ji ?”

Ze na,

“Kele katane Kulu na, éli’i tate a nga jam ntôle mone le, a kôlô’ô ».

Kulu mas ! Nde a ke sôp nlam, ô to jôé na, Mengoñ. Ze a suane Meje, a nga di bidi. Kulu a nga saé Mengoñ, bidi nlam, miaññ ! Zaé ve beta kui be Ze. Foé é nga koé Ze, be na,

“Kulu a sesaé ya saé, éyoñe ji a ne nné”.

Ze na,

“Me bo aya éyoñe ji ?”

Nye na,

“Kela katane Kulu na, éli’i mvamba a nga li’i le, Kulu a kôlô’ô, m’aben”.

Nde be nga ke kate Kulu

Kulu na,

“Va m’aye kôlô. Kela katane Ze na, ajô di bi aye bo te kate de si nyô, bi aye kate de ve bekôn.  Ze a za’a melu mebaé ».

Nde Kulu a nga loene bon, nye na,

« Fa’ane me soñ nseñ été va”.

Be nga fa’a soñ. Soñ febebe ! Si. Be nga tupe mone soñ. Kulu na,

“Kelane soñ, mi ke kuli je éno si be minga wom”.

Nde be nga mane fa’a soñ.

Melu mebaé ve kpwan, Ze a nga soo bon. Be nga jaé be Kulu. Kulu nkule kendeñ ! Bôt, lututu ! Nye na,

« M’ate jô mia na, Ze a maneya me bôé minlam mise, nde m’ajô na, nlame wu ñwô m’abutane wô. Bia Ze bi ake kate ajô di bekôn. Ma m’ataté ke. Mi vô’ôô’ô me den melu mebaé. Nge m’akabe, éyoñ éte mi aye wô’ô tyiñe jam soñe si, mi zu vaa me soñ. Nge mi bo ke te wô’ô tyiñe jam, mi na, ‘Me kuya’”.

Nde Kuu a nga nyine soñ. Nye bone na,

“Jinan”.

Bon be nga jine soñ. Nde Kulu a nga ke kui éno si be nga, ve bômbô si énoñ, ve di bidi, a bô si.

Melu mebaé, kpwas ! Nde Kulu a nga nyine si. Bôt be nga sulan, be nga vô’ôlô soñ. Kulu ve bête tyiñ soñe si na,

“Ku’ane me soñ, ku’ane me soñ ».

Be na,

« Kulu a kobô nyô”.

Bon be nga fa’a soñ, a ke vaa Kulu. Kulu a nga ke a sase nyô. Be na,

“Aya w’aso ?”

Nye na,

“A kabe. Bekôn b’ate tyi’i na, m’akabe. Be nga yange éyoñe ji ve Ze”.

Ze na,

“Za ajô afe ? Be za’a ke fa’a me soñ”.

Ze ve suan nseñ été ja dé, nye bone na,

« Fa’ane soñ”.

Bon be nga mane fa’a soñ. Nde Ze a nga nyine soñ, ve bômbô si, a jô bone na,

« Jinaan ».

Bon be nga sô’ôlô mete’e soñ. Soñ jini, ijni, meñ !

Melu mebaé, kpwas ! Bôt be nga sulan. A vô’ôlô Ze, te ke’é. A kute soñ, a vô’ôlô Ze, te ke’é. Nde bon be nga futi mo mintoñ, be nga fa’a soñ, a zu koé na, Ze a maneya voé. Be na,

“Ze a wuya”.

Nde bôt be nga jô na,

“Ze a kuya nkat. Bekôn be tyi’iya na, a ku. Kulu, nnye a kabe”.

Ze a wôlô ana.

 
 

Accueil Copyright © 2008-2011, Culture Vive