Page d'Accueil

Zum a Nga Butan Njoñ

   

A nga bo na, Zum a nji taté bo jôé na, Zum. Be nga loene nye ve na, Onon. Nde a zu bo na, Zum a bo bebe’e bilé yôp. Nde ba Mvom be nga bo ñgbwa. A so be Mvom, Mvome na,

“A mô, me maneya mine betite bese, m’akôme kate min Ngan. Ve te yeme vôm m’aye nye yen”.

Zume na,

“Bo’o me jôm, ndemben m’aye wo liti Ngan”.

Nde Mvom a nga nyin, nnôme kup ôlé, be nga mane yam. Zum a nga di. A nyoñ abétôé na, mfe’e liit ! Nye na,

« Bo’o na, ane ô wô’ô na, ‘A soya ôsôé, a zuya bebe, a soya ôsôé, a zuya bebe, ô yeme’e na, a nto beta éban a wô’ô zu bebe. Vôm ate a bo na, bivulebebas ba minlo bi viane jaé nye nyôle ne lut ! O nga zu ane w’abo ô bô’ôk ».

Mvom ve kôlô si, a batane nye, nye na,

« E ! a mô, mis me nto me ne zôññ ! Te kôme yeme vôm m’aye yen Ngan, nde nnye w’akôme me kate dene nyô ».

Nde Zum a nga ya’ane nye, nye na,

« Me keya ».

Mvome na,

“Kelek”.

Zum ve ne bebebe ! a kui ntya élé yôpe na, a mbete. Ngan ve so. Nde Zum a nga ke be Ngan, a koé na, a bô ôyo. A nga vele nye,

“A Ngan ! a Ngan ! aya ? A beta akute nyina ! O nga bo nkean ôyo aya ? Ke ô nga yene jam ôyo vi”.

Nde Ngan a nga vee. Zume na,

“Ajô e ne me abume mu, e suñe atan ».

Ngane na,

« Kate’e ma, a mô ».

Nye na,

« Nge w’akômbô na, me kate wo, wôé’me étute kabate jôé ji”.

Ngan étute kabat, fa. Zum a nga di. Nye na,

“Kate’e ma”.

Zum na,

« M’ajô wo za ajôô ? Mvom a jô na, a mine wo. A maneya mine betite bese. Nde m’akate wo na, nkean ôyo wôé wu, ô bo’o na, ane ô wô’ô tyiñe jam, me jô’ô na, ‘Bebé, bebé, monômonô, a mveane bebé’, kôlô’ô fo’o, ô yeme na, a soya”.

Nde Zum a nga ke, ve ke bebe nkpwamba. A lô ane Ngan a nto bivulebebas ve jum anyu. A telé anyu yôp,

“A soya ôsôé, a zuya bebe ; a soya ôsôé, a suya bebe”.

Mvome na,

“Nne fo’o mô a nga jô me va”.

Ve ne liit ! liit ! a zu a nyin. A telé a telé nlô yôp, a lô ane minlo a bivulebebas bi jaéya Ngan anyu, Mvome na,
« nde mô a nga bele fo’o ».

Ve beta bômbô si tilii ! tilii ! A ke a nyin. Ba Ngan be nto fo’o ve ne ve’ave’an !

Afombô Zum a fombô ana, a lô ane Mvom ba Ngan be nto ve ne ve’ave’an, Zum ve telé anyu yôp,

“Bebé, bebé, monômonô, a mve’ane bebé”.

Ngan ve bumukan ôyo, nye na,

“Ke tyiñe mô j’ajô nyô ».

A suu nyôle mendime si, jôô ! Mvom a nga kute kôp, Mvome na,

“Tyiñe baa mô a te kobô nyô, m’ayeme ke je ».

Mvom a nga yô éndenden, a nga yian éndendene si, a nga loen mvôé. Zum a nga zu, lepe lepe lep ! ndek a zu bebe. A limeti afape ndiññ ! éndenden é nga timbi mefap. Zume na,

“Jé ji, a mô ?”

Mvome na,

“Bia wo bi nga ya’ane tyiñe jia. Tyiñe baa j’ato na, ‘Bebé, bebé, a mve’ane bebé’, nje m’ate dimi ».

Mvom a nga dutu éndenden, Zum, kpwap ! a nga min. Zum a wôlô ana.

Nde bi aloene môt a ne njoñe na, Zum.

 

        

 

 

 

Accueil Copyright © 2007-2011, Culture Vive